نصائح في المذاكرة

كل مااشوف حد بيذاكر لابنه افتكر امى ربنا يديها الصحة 😣😣😣بعد ماسحبناها منها على مر السنين 😳😳
كنت شاطرة جدا فى المدرسة ومابذاكرش😒 فاجى فى الامتحانات انقص درجه واتنين ..تتشال وتتهبد... ماانتى لو ذاكرتى هتطلعى الاولى ..وتفضل بعد كل شهر ياعينى تنتع فى قلبها وتقولى بوقين انى احس على دمى؟ ....ابدا ....المهم بعد الكلام اللى فى جنابى كنت بقوم واقول انا هكسر الدونيا 💪...هيا ديتها يوم واحد ويرجع ابوك عند اخوك ولاااااااا الهوااااا 😒😒😒
والله انا شخصية حساسة لاباس بها بس معرفش التناحة اللى كنت فيها دى من ايه
ولما كبرت ودرست مخ الطفل وشخصيته ...عرفتنى😊 ..اه وربنا ....فهمتنى😊 انا كنت عاملة كدة ليه
سيبوكوا منى بقة و نتكلم بالعلم
دلوقتى تعالوا نتفق على قاعدتين اساسيتين
الاولى ...الطفل اللى يخلص اللى عليه حتى لو بيكرهه كدة لوحده ويبقى حاسس بالمسئولية ويذاكر من نفسه نسبته فى الاطفال 20% ومهما تركبى حصان عرابى وتفضلى تخطبى ياابنى مذاكرتك ياابنى مصلحتك او تلبسى العمة وهاتك يانصح وارشاد كله فى الهوا ياااامى
الثانية...ال80%من الاطفال  عشان يعملوا اللى عليهم وبيكرههوه لااااازم تحايل يتناسب مع شخصيته كطفل ولا يفسده
وتعالوا نتفق على مسلمتين اساسيتين
الاولى ....لايمكن ال80%هيحبوا المذاكرة لو عملتى قرد ...بتخبطى دماغك فى الحيطة
الثانية ...بتوهبى مثلا 4ساعات كل يوم للواجبات والمذاكرة وماتخلصيش الا بطلوع الروح ده لو خلصتى.
💡الحل ....ومافيش غيره ...وماتحاوليش غيره لانك فى الاخر هترجعيله
قسمى المذاكرة لفترات بينهم انشطة ترفيهية بتشاركيه فيها .....
والمدة حسب السن والقدرة اننننتى اللى تحددى
ويبقى عارف
اول ماتخلصى واجب العربى هنحمر مع بعض طاسة بطاطس
اول ماتخلص الواجب الاول فى الانجليزى هنلعب  سوى بالمكعبات مع بعض
وهكذا
واحدة تقولى مافيش وقت للكلام الفارغ ده
اقولها ياحاجه ..ارحمينى ...ماانتى بتفضلى تهاتى عشان يكتبلك صفحة واحدة وبتعدوا فيها ساعة ومناهدة ومحايلة ..وفى الاخر تطلعوا كارهين بعض ومقطعين هدوم بعض وداهية تاخد التعليم واللى بدعه لكن لو قولتيله اكتب الصفحة دى ونطلع ناكل رز بلبن فى البلكونة مع بعض هيخلصها فى ربع ساعة وربع ساعة رز بلبن يبقى خلصناها فى نص ساعة وكسبنا بعض والدونيا ربيع
انتى عارفة اللى مانعك من كدة؟؟؟؟
انك مش طايقه اصلا تعدى فى البلكونة تاكلى رز بلبن ...مش طايقة تكونى ام ...عاوزة تخلصى اللى عليكى وبسسس وتنزلى من على نافوخك المسئولية اللى شايلاها لوحدك
والله عارفة ...القفة ام ودنين يشيلوها اتنين وانتى شايلة القفة لوحدك ...بس الزعيق والشخط والمناهدة هتخليكى توقعى القفة اصلا ....يبقى انت تشيلى القفة صح
...  هتبقى سليمة وتفرحى بيها والله
#شيلى_القفة_صح
#عودى_طفلة