الام التعيسة عمرها ما تطلع اطفال سعداء !!
الام العصبية اطفالها هيبقوا عصبيين زيها !!
و الحزن و التعاسة و العصبية و الجنان اللى بتبقى فيها الامهات سببه مش ان اطفالهم فوق الوصف بس.
لأ .. ابدا الاطفال هم الاطفال ....السبب هو اننا احنا اللي حكمنا على نفسنا بمجرد ما اختارنا مشوار الامومة بالاعدام .
خلينا معنى الامومة حاجة واحدة و هى التضحية !!
مع ان التضحية دايما بتبقى فى وقت الاختيار الصعب مش طوال الوقت .
خلينا التضحية ان الام ما تهتمش بنفسها , و حياتها تركنها على جنب و كأن الاستمتاع بالحياة و الاهتمام بالنفس فى وجد طفل ده فى حد ذاته جريمة .
عمر ما اولادك هيتفوقوا فى دراستهم ....و امهم خلصت دراسة من زمان و توقفت على كدة و مش عايزة تتعلم اكتر من كدة او حتى تخصص وقت فى يومها تقرأ فيه لنفسها كتاب جديد .
عمر ما أولادك هيطلعوا عندهم همه .....وامهم قاعده طول النهار قدام النت او بتقلب في التلفزيون علشان تتابع اخر حاجه في السياسه
عمر ما أولادك هيطلعوا حافظين القرءان ومحافظين علي الصلاه وبارين بيكي ....وامهم عمرها ما مسكت القرءان قدامهم وحفظت هي كمان ... او حببتهم في الصلاه وصلت معاهم ..
عمر ما اولادك ما هيتعلموا الكفاح و معني الهدف طول ماهم شايفين امهم يدوبك أمنيه حياتها كلها انها تخلص شغل البيت و بتعتبره مجهود شاق
عمر اولادك ما هيتعلموا الابداع او التمييز .....طول ما امهم قاعدة فى البيت بتطبخ و تنضف و مش بتتعلم او بتُبدع فى اى فن او مهارة جديدة عليها .
عمر ما اولادك هيتعلموا يحافظوا على صحتهم و مظهرهم طول ما هم شايفين والدتهم مش بتعمل حاجة غير انها تتخن و ما بتلعبش رياضة لأنها كبرت عليها .
عمر ما اولادك هيعرفوا يقضوا وقتهم بسعادة طول ما والدتهم بترفض تشاركهم العابهم لأنها مشغولة عن (اولادها) طول اليوم بحجه البيت والتنضيف
عمر ما اولادك هيشوفوا اى نجاح فى شخصيتهم او حياتهم العملية و العلمية و الاجتماعية طول ما اول قدوة عندهم مش بتعيش النجاح
..........و كله بإسم التضحية .
التضحية بتيجى دايما وقت الخطر....... لكن باقى الوقت لازم نتحرى السعادة عشان ننقلها لأولادنا
لأن :
( فاقد الشىء لا يعطيه )
